Monday, 28 September 2015

बाऊ समर्थक हउअन बेटवा विरोधी हौ


बाऊ समर्थक हउअन बेटवा विरोधी हौ
एही हो चुनाव से चलत रोटी रोजी हौ
गाड़ी चार पहिया से रोजे सफर बा
वोटिया से जादे नोटिये पे नजर बा
कहीं ईंट पत्थर कहीं चलत गोजी हौ
बाऊ समर्थक हउअन बेटवा विरोधी हौ
खेत कियारी क चिंता भुलायल बा
बिन बरसात हो धनवा सुखायल बा
घर परिवार सबे लागल चुनाव में
पेटवा में बेटवा भी बहुत अकुलायल बा
कोई जिंदाबाद नेता कहे कोई लोभी हौ।
बाऊ समर्थक हउअन बेटवा विरोधी हौ।
कोई कहे हम रस्ता पएड़ा बनवाइब
कोई हैण्डपम्प समरसेबुल लगवाइब
कोई बोले चकबंदी में करब समर्थन
जितब चुनउआ जमिनियां नपवाइब
हँसत बा बहुत जे इनकर भुक्तभोगी हौ
बाऊ समर्थक हउअन बेटवा विरोधी हौ ।।
आपन समीकरण बतावत बा कोई
वोटिया क गिनती करावत बा कोई
कोई मीट मुर्गा पे भयल हौ निर्भर
इंग्लिस औ देशी लगावत बा कोई
लडिजा चुनाव "यश" तोहार बड़ा तेजी हौ
बाऊ समर्थक हउअन बेटवा विरोधी हौ।।
-----------------------
साभार © प्रवीन यादव"यश"(पत्रकार)
9450112497
Post a Comment